Өчигдөр МҮОНРТ-ийн “Цагийн хүрд” мэдээллийн хөтөлбөрөөр гэнэт нэг шуурхай  мэдээ гарсан.  “МҮОНРТ-ийн захирал Ц.Оюундарь нь хууль зөрчиж, ажилчдын эрх ашигт халдаж байна” гэсэн агуулгатай мэдээлэл цацагдсан. Харин тэрбээр өөрийн цахим хуудаснаа “Сэтгүүлчдийг ажлаа тараад явсан, эзгүй үеэр ММ агентлагийн дарга Ч.Батцэнгэл эфирт бэлэн бэлтгэсэн ийм мэдээ оруулж ирээд шууд Цагийн хүрд дундуур өгсөн байгаа юм. Ийм ёс зүйгүй байж болохгүй л дээ. Манай сэтгүүлчид байсан бол хэн нь ч ийм зүйл хийхийг зөвшөөрөхгүй байх байсан. Энэ бол байж болшгүй үзэгдэл. Түүхэнд байгаагүй зүйл. Ийм буруу увайгүй үйлдлийг жишиг болгон тогтоож яавч болохгүй. Тэгээд ийм үйлдлээ ялсан намын нэр барьж намайг зайлуулах аргаар хамгаалуулах гэвэл бүр бүтэхгүй санаархал” хэмээн тайлбар хийгээд байгаа.

Тэгвэл өнөөдөр УИХ-ын Төрийн байгуулалтын байнгын хорооны хуралдаанаар  МҮОНРТ-ийн үйл ажиллагаатай танилцаж, дүгнэлт гаргах ажлын хэсэг байгуулах асуудлыг хэлэлцсэн байна. УИХ-ын гишүүн Ж.Мөнхбатаар ахлуулсан ажлын хэсэг байгуулж, дөрвөн гишүүний бүрэлдэхүүнтэй ажиллуулахаар болж байна. Дашрамд өгүүлэхэд,  МҮОНРТ хуулийн хэрэгжилтийг хэрхэн хангаж байгаа талаар шалгуулах санал хүсэлт УИХ дээр хэдэнтээ ирсэн гэх мэдээлэл энэ үеэр яригдсан юм.