Зам тээврийн хөгжлийн яам, улс хоорондын ачаа тээвэрлэдэг аж ахуйн нэгж байгууллагууд хамтран мэргэшсэн жолоочийн үнэмлэхтэй хүмүүсийг бүртгэж, ажилд авахаар болсон билээ. Энэ хүрээнд өчигдөр, өнөөдөр хоёр өдөр Хан-Уул дүүрэгт байрлах Хөдөлмөрийн ордонд 09.00-17.00 цагийн хооронд иргэдийг ажилд зуучлах өдөрлөг зохион байгуулж байна. Энэ үеэр 37 аж ахуйн нэгж 450 нээлттэй ажлын байр санал болгох юм.

Ажил хайгчид С, Е ангилалтай мэргэшсэн жолооч байх шаардлага тавьж байгаа юм байна. Мөн бусад ангиллын жолооч бол ажил олгогч байгууллагатайгаа тохиролцож гэрээ байгуулсны үндсэнд ажил олгогч төлбөрийг дааж, Хөдөлмөрийн бирж дээр ажиллаж буй жолооны курсүүдэд суралцуулан цаашид ажилд авах юм байна. Суралцагч гэрээний дагуу ажилд орсны дараа сургалтын төлбөрөө цалингаасаа өгөх боломжтой аж. Жолооч нарыг нас харгалзахгүй ажилд авах бөгөөд хөдөө орон нутагт ажиллах боломжтой байх шалгуур тавьсан байна.