“Чингис”, “Самурай”  бондын мөнгөний зарцуулалтыг шийдэж байсан нөхдүүдийг тэргүүлэх сайд хийгээд гишүүн асан Н.Батбаярыг сэжигтнээр татан шалгаж байгаа билээ. Түүнийг бондын олголт, зарцуулалттай холбогдуулан албаны эрх мэдлээ хэтрүүлсэн, төсвийн хөрөнгийг үрэгдүүлсэн гэх үндэслэлээр, Эрүүгийн хуулийн тусгай ангийн 263 дугаар зүйлийн 263.2, 264 дүгээр зүйлийн 264.2, 150 дугаар зүйлийн 150.3-т зааснаар сэжигтнээр тооцон АТГ-т шалгаж байгаа юм.

Уг нь түүнийг саатуулан шалгах шаардлага гарсан ч,  Н.Батбаяр өөрийнхөө эрүүл мэндийн байдлыг, бүр тодруулбал, зүрхний өвчтэй тул гадуур байцаагдая гэсэн хүсэлтээ ирүүлсэн гэх мэдээлэл байгаа юм. Тэрбээр  Эдийн засгийн хөгжлийн яамыг удирдаж байх үедээ  “Чингис”, “Самурай” бондуудын нийт 2.1 тэрбум ам.долларын захиран зарцуулалтыг хариуцаж,  “Гудамж төсөл”, “Гэр хорооллын дахин төлөвлөлт” болон 888 төсөл хөтөлбөрүүд зэрэг олон төсөл хөтөлбөрүүдэд санхүүжилт хийсэн байдаг. Гэхдээ тэгээд төсөл хөтөлбөрүүдийн санхүүжилт нэрийн дор бондын мөнгөнөөс хийдүүлсэн явдал нэлээд байгаа тул хуулийнхан Н.Батбаяр, Хөгжлийн банкны захирал асан Н.Мөнхбат  нарын хүмүүсийг шалгаж буйг эх сурвалж хэлж байгаа юм.

Эх сурвалж: Шуурхай.мн