Дуучин Д.Отгонжаргал, “Гайз”-ын Мигаа хоёр Ану хатан, Галдан бошигт хаанд тоглосон “Ану хатан” киноны зохиолч нь сэтгүүлч Б.Шүүдэрцэцэг. Харин найруулагчаар жүжигчин “А.Артист” продакшны захирал Т.Алтантуяа ажилласан юм.

Энэ кино нь хоёр жилийн өмнө “АНУ ХАТАН” кино маань “ДАЙЧИН ХАТАН” нэртэйгээр Америкийн зах зээл дээр blu-ray-ээр зарагдсан удаатай. Гэтэл үүнээс удалгүй нэгэн цагт гар нийлэн ажилласан бүсгүйчүүд муудаж, тэр нь олны анхаарлыг татах нь тэр.  Өөрөөр хэлбэл “Ану хатан” романыг бичсэн зохиолч Б.Шүүдэрцэцэг киногоо гадаадын зах зээлд гаргахдаа өөрийгөө найруулсан хэмээн бичиж, найруулагч Т.Алтантуяг “жийсэн” аж.  Харин энэ тухай Т.Алтантуяа найруулагч саяхны нэгэн ярилцлагандаа ийнхүү ярьжээ.

Энэ талаар Т.Алтантуяа найруулагч “Зохиолч Б.Шүүдэрцэцэг над дээр ирж уучлал гуйгаад алдаагаа засна гэдгээ бичгээр мэдэгдсэн. Тэрнээс хойш зөндөө хугацаа өнгөрсөн ч одоог хүртэл надад зассан гэдгээ хэлээгүй байгаа.  Өнөөдөр “Ану Хатан” киног хэн найруулсан бэ гээд олон улсын киноны сайтад ороод харвал найруулагч Б.Шүүдэрцэцэг гээд гараад ирнэ.

Уг нь би анх удаа Монгол Улсаас АНУ-д албан ёсны эрхтэйгээр томоохон дистрибютер Лионсгэйт  авсан болохоор улсынхаа нэрийг бодоод ойлголцсон юм. Гэтэл би гадны уран бүтээлчдэд өөрөө найруулсан бүтэн хоёр жил хөдөлмөрлөсөн “Ану хатан” киногоо хэлэхээр “Уучлаарай, Ану хатан буюу Дайчин хатан кино таных  биш, Шүүдэрцэцэгийн найруулсан кино гэж бүртгэгдсэн байна” гэж хэлдэг.

Хэлэх үг алга даа. Миний бүтээлийг хэн нэгэн шууд үгүйсгээд, өөрийнхөө нэрийг тавиад явах хэнд сайхан байх вэ дээ. Эмэгтэй хүний төлөө тэмцэж, сайхан сэтгэлээр хандивын үйл ажиллагаа зохион байгуулж , энд тэнд хүүхэд  залуустай уулзалт хийж, киноны тухай илтгэл тавьж, ёс зүй, соён гэгээрэл гэж хаа сайгүй ярьдаг зохиолч хүн юм чинь хэлсэн үгэндээ хүрэх байх гэж итгэж найдаад л хүлээж байна даа” хэмээн ярьжээ.