Хэмнэж гамнахаа өөрсдөөсөө эхэл гэдэг хандлага, уур амьсгалыг улстөрчид нийгмийн зүгээс нэлээд мэдэрч байгаа биз. Тэвчиж болох зардалд УИХ-ын гишүүдийн зарим зардлыг оруулах ёстой гэсэн асуудлыг гишүүдийн олонх дэмжихгүй байгаа юм. Тухайлбал, Я.Содбаатар гишүүн энэ талаар хэлэхдээ  “УИХ-ын гишүүдийн зардалтай холбоотой буруу зөрүү мэдээлэл байна лээ. Би энд тайлбар хийе. Өнөөдрийн байдлаар УИХ-ын гишүүдийн зардал мөнгийг ч бас бусад төрийн байгууллагатай адил танасан явж байгаа шүү. Өөрөөр хэлбэл, томилолт, бичиг хэрэгтэй холбоотой зардлыг танаж байна. УИХ дахь МАН-ын бүлгээс цалин, тэтгэвэр тэтгэмжийг бууруулахгүй байх шийдвэрийг гаргасан. Одоогоор УИХ-ын гишүүн туслах болон бие төлөөлөгч, зөвлөхтэй ажиллаж байгаа. Энэ таван хүний цалин УИХ-ын гишүүдийн зардлын бараг 90 хувьд хүрдэг. Цаана нь орон нутгийн томилолт болон бичиг хэргийн багахан зардал үлддэг юм. Ингэж нэгд нэгэнгүй хэлэхгүй бол буруу зөрүү мэдээлэл цацагдаад байна. Жишээлбэл, УИХ-ын гишүүд ойролцоогоор сард 60-аад мянган төгрөгөөр утсаар ярих эрхтэй байдаг. Энэ мэт нарийн тоог удахгүй олон нийтэд нээлттэй мэдээлэх ёстой гэж бодож байна.” хэмээн ярьж байна.