“Эрдэнэс  Монгол”-ын гүйцэтгэх захирал Б.Бямбасайханы талаар анхаарал татсан мэдээллүүдийг бид цувралаар хүргэж байгаа билээ. Эдийн засгийн тулгуур болно гэх хүлээлтийг олон жил дагуулсан стратегийн томоохон ордуудыг эргэлтэд оруулах үүрэгтэй “Эрдэнэс Монгол”-ын захирал болоод жил гаруйн хугацааг үзэж байгаа тэрбээр өнгөрсөн хугацаанд чамгүй асуудалд нэр холбогджээ. Ер нь морьдохын хазгай гэгчээр эхнээсээ л “эзэн 100” энэ тэр гэж шоудаж олонд танигдсан тэрбээр өнгөрсөн хугацаанд стратегийн чанартай томоохон асуудлуудын талаар том л дуугараад яриад байснаас бус, хэлж ярьснаа хэрэгжүүлэх гэж бодит алхмууд хийсэн нь юу л бол.

Тэр уг нь сайн сайхан зүйл их ярьсан даа. Ямартаа л компанийн бүтцээ шинэчлэх хүрээнд Азийн хөгжлийн банкнаас 35 сая ам долларын зээл авна гэж байсан. Мэдээж энэ бол бага мөнгө биш. Тэгээд яасан гэхээр, өнгөрсөн дөрөвдүгээр сард “Эрдэнэс Монгол” компани охин компаниудынхаа ашигт ажиллагааг нэмэгдүүлэхэд зарцуулна гэсэн  тодотголтойгоор 35 сая ам.долларыг  Азийн  Хөгжлийн Банкнаас зээлж авсан юм. “Таван Толгой”, Багануур, Шивээ овоогийн уурхайн үйл ажиллагааг өргөжүүлэх гэж энэ мөнгийг авсан гэж байгаа ч, чухам яаж өргөжүүлээд байгаа нь одоогоор мэдэгдэхгүй байна. Лав л тэр их мөнгийг зээлэх гэрээнд “Эрдэнэс Монгол” компанийн тэргүүн Б. Бямбасайхан, Азийн Хөгжлийн Банкны Монгол дах суурин төлөөлөгч Роберт Шуллхаммер нар гарын үсэг зурсан юм.

Чухам тэгээд “Эрдэнэс Монгол”-ын одоогийн нөхцөл байдал ямар байна вэ гэхээр Б.Бямбасайхан захирлын тухайд  “Моннис”-ийн Чулуунбаатартай нийлэн төрийн мөнгөөр тансаглаж байгаа гэх асуудалд нэр холбогдоод байгаа юм. Илүү мөнгө төлөөд байх шаардлагагүй төрийн өмчийн компанийн байранд байж болох байтал заавал  “Моннис” цамхагийн 14, 15-р давхарт түрээс төлж, оффислож, бас болоогүй 15 давхартаа супер засвар хийлгэх шаардлага байсан ч юм уу, үгүй ч юм уу.

 Б.Бямбасайхан захирал “Монгол улсын нягтлан бодох бүртгэлийн тухай хуулиар манай компаниуд олон улсын нягтлан бодох бүртгэлийн стандартыг дагах ёстой. Өнгөрсөн 3 жилийн санхүүгийн тайландаа олон улсын нягтлан бодох бүртгэлийн стандартын дагуу “Эрнст энд Янг” компаниар аудит хийлгэж дууслаа. Юуны түрүүнд ингэж аудит хийлгэж байгаа нь маш чухал. Бид өөрсдийнхөө нөхцөл байдлыг хаана байгааг, олон улсын стандартаас хэр зөрж байгааг мэдэж, ойлгож авах хэрэгтэй. Шаардлагатай бол дутуугаа засч сайжруулна. Бидний байнга ярьж байгаа “Темасек” шиг компани болохын тулд бидэнд хөрөнгө мөнгө шаардлагатай. Хөрөнгө босгохын тулд аудитлагдсан санхүүгийн тайлан үндсэн шаардлага болдог. Олон улсын аудитын компаниар тайлангаа хянуулсаны үр дүн 5 жилийн дараа гарна” гэж хэвлэлд ярьсан байдаг. Бүхэл бүтэн таван жилийн дараа үр дүн гарна гэж өөрөөсөө хариуцлагыг түлхэж ярих тэрбээр 35 сая долларын зээлийн мөнгийг хэрхэн үр ашигтай зарцуулж байгаа талаараа тайлагнах шаардлагатай болов уу.

Үнэтэй оффист, ийм дэмий балай юм ярьж суухын оронд Тавантолгойг эдийн засгийн эргэлтэд оруулсан шиг оруулахад чухам яг ямар гарцууд байгааг нарийн тодорхой гаргаад ирэх сэтгэл, ухаан түүнд байдаггүй л юм байх даа.

Эх сурвалж: Шуурхай.мн