АН ямар ч байсан эхлээд орон нутгийн сонгуулийн ард гарчихаад, намынхаа шинэчлэлийн асуудал руу оръё гэж байх шиг байна. Гэхдээ энэ нь агуулга биш хэлбэр талаасаа тэгж харагдаж байгаа гэдгийг тодотгоё. Тэртээ тэргүй намын эрх мэдлийг фракцилж авах асуудал дээр тус намынхан тэмцэл өрнүүлж байгаа нь нууц асуудал биш ээ. Тэрчлэн өнгөрсөн долоо хоногт товлогдоод байсан ҮЗХ-ны хуралдаанаар хэлэлцэх асуудлууд нь угтаа бол цаашид хэн удирдах вэ гэдгийн суурь болж өгөх ёстой байсан л даа. Гэвчиг орон нутгийн сонгуулийн дараа гэж хойш тавьлаа. Тэгээд намын даргын үүрэг гүйцэтгэгчээс өөрийн хүсэлтээр чөлөөлөгдсөн Д.Эрдэнэбат намынхаа сонгуулийн штабыг удирдах гэнэ. Цаашдаа намыг залуурдана гэж байгаа хүний тухайд энэ бол бас л том зориг шүү. Үнэхээр ялна гэсэн бат итгэлтэй байж л, штабыг удирдахгүй бол ялагдлын түүхийг дахин давтах гэж штаб удирдахын хэрэг байхгүй билээ.

Хэрэв дахиад АН ялагдвал Д.Эрдэнэбатад АН-ын дарга болох боломж олдох уу гэдэг асуудал угаасаа гарч ирнэ. Түүнээс гадна П.Цагаан, С.Эрдэнэ, Л.Болд, Г.Батхүү нарын нөхдүүд намын даргын суудалд нэр нь бас яригдаж байгаа.

Ямартай ч тус намын Гүйцэтгэх зөвлөлийн  хуралдаанаас сум, дүүргийн Иргэдийн Төлөөлөгчдийн Хурлын 2016 оны сонгуульд Ардчилсан намыг удирдан оролцуулах сонгуулийн менежерээр УИХ-ын гишүүн Д.Эрдэнэбатыг томилж, сонгуулийн штаб байгуулж ажиллахыг үүрэг болгоод байгаа. Тэгэхээр нэг талаас Д.Эрдэнэбатад боломж олгож байгаа харагдана. Ер нь бол энэ удаагийн сонгууль Д.Эрдэнэбатын тухайд намын даргад өрсөлдөж байгаа нам нэгт нөхдүүдтэйгээ өрсөлдөж байгаа өрсөлдөөн гэж бас харагдаж байгаа юм.

Эх сурвалж: Б.Итгэл, Шуурхай.мн