Тулгууртай харайлтын олимпийн хошой аварга, ОХУ-ын нэрт тамирчин Елена Исинбаева их спортоо орхиж буйгаа зарлалаа. Тэрбээр Риогийн олимпийн хотхонд хэвлэлийн бага хурал хийлгэхдээ энэ талаар албан ёсоор мэдэгдсэн юм. Исинбаева Риогийн олимпийн наадамд оролцохын тулд бэлтгэлээ хийж, хүлээж байсан ч ОХУ-ын хөнгөн атлетикчдыг олимпийн наадамд оролцуулаагүй билээ.

“Токиогийн олимпийн наадамд би оролцохгүй. Хичнээн хүслээ ч гэсэн дөрвөн жилийн дараагаар олимпод оролцож чадахгүй биз дээ. Одоо л надтай өрсөлдөж буй тамирчид 10 дүү байна шүү дээ.

Их спортоо орхиж буйгаа зарлахдаа нулимс унагаж, их гунигтай байх болов уу гэж бодож байсан ч ОУОХ-ны хороонд сонгогдсон болохоор харьцангуй сэтгэл хөнгөн байна. Тийм ээ, би төрийн дууллаа эгшиглүүлэх хүсэл, тулгууртай харайлт, тэмцээний талбараасаа холдох гэж байна. Гэхдээ тамирчны хувьд хүрсэн бүхэндээ сэтгэл хангалуун. Хүртэж болох бүхий л медалийг би хүртлээ. Мөн дэлхий дахины хайр талархлыг хүлээлээ. Энэ бол мөрөөдлийн оргил юм” гэж Исинбаева өгүүлжээ.

Р.Гэгээ