РИО-2016  олимпийн наадмын боксын тэмцээний  эрэгтэйчүүдийн 60 кг-д өрсөлдсөн манай боксчин Д.Отгондалай хүрэл медалийн болзол хангаад байна. Тэрбээр  мөнгөн медалийн төлөө наймдугаар сарын 14-ний өдөр Францын Софьян Умиатай тоглох юм.

Д.Отгондалай эхний тойрогт хийлж, Нидерландын боксчин Энрико Лакрусаг хожин шөвгийн наймд үлдээд байсан билээ. За харин шөвгийн наймд Алжирын боксчин Реда Бенбазизтай тулалдаж, 3:0-ээр илүүрхэн хожиж Монголчуудаа баярлууллаа.

Түүний спортын замналыг харахад боксоор хичээллээд 13 жилийн нүүрийг үзэж байгаа юм. Тэр нэгэнтээ боксод хөл тухайгаа  “Гавьяат дасгалжуулагч Ё.Төмөрбатаа багшийн дугуйланд найзуудаа дагаж ирээд бүртгүүлж байв. Долоо хоног сургуулилт хийгээд л энэ спортод дурласан. Надтай хамт боксоор хичээллэсэн олон хөвгүүн бэлтгэлийн явцад орхисон доо. Надад шантарч халгах үе зөндөө байсан. Тийм үед сэтгэлд төрсөн таагүй бодлоо толгойноос авч хаяад нэгэнт энэ спортоор хичээллэсэн юм чинь үр дүнг нь үзье гэж хичээх болсон…  Би боксын спортоор тууштай хичээллэсэндээ баярладаг. Надад автобусны мөнгөгүй болчихоод алхах үе бишгүй байв. Тийм хэцүү үед бэлтгэл сургуулилтаа тасалж байгаагүй. Тэр үед би оюутан, шигшээ багт багтсан тамирчин байлаа. Хүн өөрийнхөө зорилго тавьсан зүйлд мөнгөгүй ч байсан зориод ирдэг. Бэлтгэлээ тарчихаад эхнэртэйгээ Офицерт байдаг гэр рүү алхаад харина. Тэр үеэ эргээд дурсахад сайхан байна. Хүнд хэцүү санагддаг байсан тэр бүхэн амьдралд минь сайхан дурсамж үлдээжээ. Бид хааяа “Спортын төлөө хоолтой, хоолгүй хоносон өдөр цөөнгүй. Одоо тэр бүх бэрхшээл ард хоцорчээ” гэж ярьдаг юм.” хэмээн ярьсан байдаг.

Монголынхоо нэрийг дэлхий даяар гаргаж яваа түүнд өшөө илүү амжилтыг хүсье.

Эх сурвалж: Шуурхай.мн