Рио-гийн олимпод хүндийг өргөлтийн 69 кг-ын жинд Монгол Улсаа төлөөлөн дэлхийн шилдгүүдтэй өрсөлдсөн М.Анхцэцэг огцомоор 106 кг, түлхэлттэйгээр 131 кг-ыг өргөж наймдугаар байрт бичигдэж, маш сайн оролцлоо.  Өдгөө 18 настай ОУХМ М.Анхцэцэг ирэх олимпуудад Монголынхоо нэрийг гаргах хэмжээнд бэлтгэгдэж яваа, улам урагш өсч дэвжих ирээдүйтэй тамирчин гэдгээ харуулж байна гэхэд болох байх. Түүнд баяр хүргэж, илүү өндөр амжилтыг хүсье.

Аль ч спортын төрөл амар биш. Тэрдундаа хүндийг өргөлтийн спортыг эмэгтэй хүнд ахадмаар гэж ойлгож, хүлээж авдаг хүмүүс олон. Тэгвэл М.Анхцэцэгийн тухайд энэ хүнд спортод дурлаж, гүн гүнзгий автан оржээ. Тэрбээр уг спортоор чухам яагаад хичээллэх болсон талаараа сэтгүүлчийн асуултад хариулахдаа  “-Хүмүүс ярьдаг шүү дээ, аав, ээж, ах, эгчийнхээ сонирхлоор спортод орсон гэж. Харин надад тэдний хүсэлд хөтлөгдөөд спорт руу орсон юм байхгүй. Аав, ээж минь цэргийн улс. Тэд насаараа цэргийн албанд зүтгэсэн. Би энэ спортод өөрийнхөө дур хүслээр л орсон. Тэр үед 10 настай байсан. Нийслэлийн 114 дүгээр сургуульд сурч байх үедээ сагс тоглолоо гэж гараад л хэдийнэ төмрөө өргөчихдөг байсан. Ер нь нэг хэсэг аав, ээжээсээ нууж бэлтгэл хийдэг байсан. Анх н.Цэрэнням багш дээр очиж байсан. Одоо бодоход бэлтгэл хийх талбайгүй хэрнээ сургуулийн коридорт л төмөр өргөөд зогсдог байж. Дараа нь 2008 онд юм байна. Спортын төв ордны хүндийн өргөлтийн н.Чулуунпүрэв багш дээр очсон. Мэдээж гэр бүлийнхэн намайг төмөр өргөөд явахад дуртай биш байсан.

Би бэлтгэлээ хийсээр анхны тэмцээнд амжилт гаргаж, медаль аваад ирсэний дараа л аав, ээж баярлаж байсан. Тэгээд тэд надад итгэж, энэ спортоор хичээллэхийг минь зөвшөөрсөн. Дөнгөж 12-хон настай охин 2009 онд Ерөнхийлөгчийн цомын тэмцээнд орж, спортын мастер цол биелүүлж, их л баярлаж байлаа. Ингэж л энэ спортод орсон түүхтэй. Тиймээс би тэр цагаас хойш энэ спортоос гарч чадаагүй.” хэмээн ярьсан байдаг. Тэгэхээр бага жаахан охин байхдаа л хүнд спортын хүндийг мэдсээр байж дурласан уг спортдоо тэр их амжилтыг гаргана биз ээ. Тиймээ, М.Анхцэцэгээс амжилт хүлээнэ, Монголчууд!

Эх сурвалж: Шуурхай.мн