Шинэ Засгийн газар 10 тохируулагч агентлаг, 17 хэрэгжүүлэгч агентлагтайгаар ажиллах юм. Засгийн газраас өгсөн мэдээллээр Төрийн захиргааны байгууллагын тогтолцоо, бүтцийн ерөнхий бүдүүвчийг шинэлэчлэн баталсантай холбогдуулан Засгийн газрын хэрэгжүүлэгч агентлаг-Тахарын ерөнхий газрыг татан буулгахаар шийдвэрлэжээ. Тахарын ерөнхий газрын чиг үүргийг холбогдох агентлагуудад шилжүүлэх юм.

УИХ-ын 2016 оны 12 дугаар тогтоолоор баталсан “Төрийн захиргааны байгууллагын тогтолцоо, бүтцийн ерөнхий бүдүүвч”-ийн дагуу Засгийн газрын тохируулагч болон хэрэгжүүлэгч агентлагуудыг байгуулж, орон тооны хязгаарыг баталжээ.

Ер нь бол Тахарын албыг татан буулгах тухай асуудал өнгөрсөн засгийн үед ч яригдаж ирсэн билээ.

Тодруулбал, Ч.Сайханбилэг Ерөнхий сайд болж,засгийн бүтэц бүрэлдхүүний асуудал дахин яригдаж байсан тэр үед Х.Тэмүүжин байр сууриа илэрхийлэхдээ  “Яагаад Тахарын албыг татан буулгахаар болов. Энэ санаачлагыг хэн гаргасан бэ? МАН-тай хийсэн зөвшилцөл, тохиролцооны нэг хэсэг байв уу. Энэ бол гэрч, хохирогчийг хамгаалах бодлогыг үгүй хийх гэж буй явдал.  Арай гэж хөл дээрээ тогтож, үйл ажиллагаа нь жигдэрч байгаа газрыг татан буулгах шаардлага юунд байв. Иргэндээ үйлчилдэг, хүчирхийлэлд өртөгч, өртөх магадлалтай хэсэгт үйлчилдэг механизмыг үгүй болгох нь хэнд хэрэгтэй гэж. Дуртай нь гэрчийг айлгаж, дуртай нь гэрчийн мэдүүлгийг өөрчлүүлж, хүссэн эрх мэдэлтэн нь шүүх хурлыг хойшлуулж байна шүү дээ” гэж байв. Харин Ч.Сайханбилэг Ерөнхий сайдын хувиар хариулахдаа  “Хэлэлцээний явцад төрийн захиргааны бүтцийг цомхон болгох талаар яригдсан. Шинэ бүтцээр 413 орон тоог хэмнэхээр орж ирж байгаа. Цаашид ч нэр, үйл ажиллагаа, эрхлэх асуудал нь ойролцоо байгууллагуудыг цомхотгоно.” гэж байсан билээ. Гэхдээ тэгээд Тахарын албыг хэвээр үлдээж байв. Харин энэ засгийн үед Тахарын албыг татан буулгалаа.

Эх сурвалж: Шуурхай.мн