Монголчууд бүтэн зуныг туг, далбаа намируулж өнгөөрөх нь ээ. УИХ, НИТХ-ын сонгуулийн сурталчилгаа энэ сарын 11-нээс эхэлж, 27-ныг дуустал үргэлжилсэн. Энэ хэд хоногийн хугацаанд нэр дэвшигчид намын туг лоозонгоо энд тэндгүй байршуулж, туг далбаа намируулсан машинууд хот хөдөөгүй хөлхөлдсөн. Сонгуулийн сурталчилгаа, сонгууль ч ингэсгээд дуусах шатандаа орлоо. Үүнийг залгаад Үндэсний их баяр наадам гэж Монгол түмний хүсэн хүлээдэг баяр болно. Энэ үеэр төмөр хүлгэндээ төрийн далбаагаа намируулах сонирхолтой наадамчин олон эрс нэмэгдэж, үүнийг дагаад худалдаачид энд тэндгүй, том жижиг далбаагаа барин зогсох нь дамжиггүй. Наадам найрны цаг нэлээд хэд хоног үргэлжлэх болохоор хэсэгтээ л бид туг далбаанаасаа салахгүй нь. Ингээд байж байтал АСЕМ-ын айхтар уулзалт эхэлнэ. Долоодугаар сарын 15-16-нд болох АСЕМ-ын дээд түвшний 11 дүгээр уулзалтад 40 гаруй улсын төрийн тэргүүнүүд хүрэлцэн ирнэ гэж байгаа. Тэгэхээр төдий тооны улсын далбаа намируулсан тэрэг хотын гудамжаар давхилдаж, төдий тооны далбаа төрийн ордны гадна намирна гэсэн үг.
За тэгээд АСЕМ-ын уулзалт болдгоороо болж, дуусдагаараа дуусна. Энэ үйл явдлаар манайхны туг, далбааны үе өнгөрөх нь үү гэвэл бас үгүй.
Наймдугаар сарын 5-21-нд Бразилийн Рио-де-Жанейро хотод зуны Олимпийн наадам болно. Тус олимпод манайхан урьд өмнө байгаагүй өргөн бүрэлдэхүүнтэй буюу 40 гаруй тамирчинтай оролцох гэж байна. Тэдэн дотор алтан соёмбот төрийн далбаагаа наран доор гэрэлтүүлэх аавын хүү, ээжийн охин олон бий. Риогийн тэнгэрт төрийн далбаагаа мандуулж байх мөчид монголчуудын сэтгэл ч хөөрч, төрийн далбаагаа хотын төвөөр намируулан давхилдах нь гарцаагүй.
Энэ зун туг, төрийн далбаагүй өнгөрөх мөч нэгээхэн ч үгүй бололтой.

Эх сурвалж: