Монголын улстөр дэх 100 хар үйл явдал хийгээд тэдгээрт оролцсон хүмүүсийг тодруулж байна гэж хэлж ярих болсон МЗХ-ны Ерөнхийлөгч А.Мөнхбатыг хар жагсаалтад багтсан хүмүүс цагдаагийн байгууллагаар шалгуулахаар болжээ. Тэдгээр хүмүүс А.Мөнхбатын үйлдлийг Эрүүгийн хуулийн 110 дугаар зүйлийн 110.1-д “бусдын нэр төр, алдар хүндийг олон нийтийн өмнө доромжилсон бол…”, мөн хуулийн 111 дүгээр зүйлийн 111.1-д гүтгэх гэмт хэргийг зүйлчилсэн ба “хүний нэр төр, алдар хүндийг гутаах зорилгоор гүжирдлэг тараасан бол…”, 130 дугаар зүйлийн 130.1-д “Иргэний сонгох, сонгогдох, …эрхээ хэрэгжүүлэхэд… санаатай саад…” хийх гэснийг зөрчиж биднийг гүтгэсэн, доромжилсон, сонгогдох эрхэнд саад учруулсан гэж үзэж байгаа юм байна. МЗХ-ноос гаргаад байгаа хар жагсаалтад нэр нь орсон хүмүүс УИХ болон НИТХ-ын сонгуульд нэр дэвшиж байгаа учраас ихэд эмзэглэж хүлээж авч байгаа бололтой байна. За харин МЗХ-ны Ерөнхийлөгч А.Мөнхбатын тухайд “Хулгайчгүй Монгол” хөдөлгөөнийг өрнүүлж, нэр бүхий хүмүүсийн эсрэг зүйл хэлж ярьж яваагаа түмний төлөө гэж тодотгоод байгаа. Ямартай ч “хар жагсаалт”-д бичигдсэн хүмүүс гомдлоо цагдаагийн байгууллагад гаргасан тул А.Мөнхбат шалгагдахаар болоод байна.

Эх сурвалж: Б.Тамир, Шуурхай.мн