“Гал үндэстэн” холбооны тэргүүн Ц.Мөнхбаяр УИХ-ын сонгуульд нэр дэвших зорилготой байсан ч, хуулийн байгууллагаас гаргасан тодорхойлолт нь ялтай хугацаа нь дуусаагүй гэж байгаа учраас нэр дэвших боломжгүй болсон байна. Ц.Мөнхбаярын тухайд өнгөрсөн оны 11 дүгээр сард өршөөлд хамрагдан суллагдсан билээ. Тэрбээр Төрийн ордны хамгаалалттай бүсэд галт зэвсэгтэй нэвтэрсэн, зандалчилсан гэсэн зүйл ангиар долоон жилийн ял сонссон ч, өнгөрсөн жилийн 11 дүгээр сард Өршөөлийн хуульд хамрагдан суллагдсан юм. Ц.Мөнхбаяр өдгөө “Эвлэн мандуулах хүч” төрийн бус байгууллагын тэргүүнээр ажиллаж байгаа бөгөөд тус байгууллагынхаа Удирдах зөвлөлийн гишүүн Г.Болдбаатар нарын хамт өнөөдөр мэдээлэл хийсэн юм. Тэд хэлэхдээ УИХ-ын сонгуульд бие даан нэр дэвшихээр болсон ч Цагдаагийн байгууллагаас нэр дэвших эрхийг нь хязгаарласан нь, Үндсэн хуулиар олгогдсон сонгох, сонгогдох эрхэнд халдаж байна гэж үзэж байгаагаа илэрхийлсэн юм. Гэхдээ тэд удаагийн УИХ-ын сонгуульд нэр дэвших боломжгүй болсон ч, бие даан нэр дэвшигчдийг дэмжиж, ажиллахаар шийдсэнээ дуулгасан юм.

Б.Тамир

Эх сурвалж: Шуурхай.мн