Сонгуулийн хуульд нэмэлт өөрчлөлт оруулсантай холбогдуулан энэ сарын эхээр тойргийн асуудлыг хэлэлцэж, хаана хэдэн мандат хуваариласан. Мандат хуваарилах ажлын үеэр хамгийн их хэрүүл дагуулсан зүйл бол Хэнтийд гурван мандат хуваарилсан явдал байлаа.

Учир нь Хэнтий аймгаас их хүн амтай, илүү олон сумтай Булган зэрэг бусад аймгуудын мандатыг нэмээгүй мөртлөө АН-ын бүлгийн даргын уугуул нутгийн мандатыг нэмсэнд МАН-ынхан баахан бухимдаж харагдсан.

Харин АН-ын бүлгийн дарга хариуд “Та нар бүгдээрээ өөрсдийгөө Чингисийн үр, удам гэцгээдэг биз дээ. Чингис хааны төрсөн нутаг учраас Хэнтийд гурван мандат өгсөн” гэх тайлбар өгч олны гайхшруулсан юм. Тэгвэл өчигдөр Хэнтийн аймгийн АН-ын хороо хуралдаж ирэх сонгуульд Хэнтий нутгаасаа хүч үзэх гурван хүнээ тодруулжээ. Аргагүй л эзэн Чингисийн нутаг гэсэндээ сонгуульд дан “баатар”-уудыг өрсөлдүүлэхээр шийджээ. Тодруулбал, эхний “баатар” нь УИХ-ын гишүүн, АН-ын бүлгийн дарга Б.Гарамгайбаатар, хоёр дахь “баатар” нь Ерөнхий сайдуудад зөвлөх хийсэн М.Хүдэрбаатар нэр дэвших болсон. Харин гурав дахь “баатар”-аар нь Хэнтий аймгийн засаг дарга Ж.Оюунбаатар юм байна.

Ийнхүү Хан Хэнтий нутгаас гурван “баатар” нэр дэвшихээр боллоо. Одоо эцсийн шийдвэрийг АН-ын ҮЗХ шийдвэрлэж батламж олгоно.

Ч.Ган

Эх сурвалж: Zaluu.com