Хотын дарга Э.Бат-Үүл хүүгийнхээ оффшор дансыг огт мэдээгүй гэх мэдээллийг өгч байна. Тэр хэлэхдээ  “Энэ талаарх мэдээллийг уржигдар хэвлэл мэдээллийн хэрэгслээс олж мэдсэн. Тэр үед л хүүгээ оффшор бүсэд данстай компанитай байсныг олж мэдлээ. Мэдсэн даруйдаа хүү Б.Чулуудайтай утсаар ярьсан. Хүү маань “Хөрөнгө оруулалт хийхийн тулд 2011 онд оффшор компани байгуулсан. Гэхдээ ямар нэгэн гүйлгээ хийгээгүй” гэж надад тайлбарласан. Хүү маань гурван хүүхэдтэй, бие даасан хүн бас бизнесмэн. Би ажилд нь тэр бүр ороод байхыг хүсдэггүй. Би хүүдээ “Бүх зүйлийг хуулийн дагуу хийж байгаарай” л гэж захиж хэлсэн. Ийм л юм болсон” хэмээн ярьж байна. Тэгэхээр Хотын дарга маань хүүгээ тендерт ялахад ч ямар нэг байдлаар оролцоогүй бөгөөд оффшор дансных нь талаар бол бүр юу ч мэдэхгүй төдийгөөс өдийг хүрсэн гэж л ойлгогдож байна.

Б.Чулуудайгийн тухайд мэдээлэл хийхдээ  “Оффшорт бүртгэлтэй гээд байгаа “Стратежик майнинг”  компанийг Сингапурын иргэн найзынхаа хамт 2011 онд байгуулж, 2013 онд хаасан. Тухайн үед хүн бүр л уул уурхайд хөрөнгө оруулалт гэж хошуурч байхад хийхийг зорьсон бизнес. Тэгээд бүтээгүй. Өөрөөр хэлбэл, миний аавыг хотын дарга болохоос өмнө 2011 онд байгуулагдсан компани шүү дээ. Үйл ажиллагаа явуулахгүй байж байгаад хаагдчихсан.  Данс нээгээгүй учраас нэг ч долларын гүйлгээ хийгдээгүй. Ер нь энэ далимд хэлэхэд би хар багаасаа л иргэний эрхээ эдлэж чадахгүй байнга хардлагад өртөж, гүтгүүлж дайруулж ирлээ. Улс төрчийн хүү болсон минь буруутай бололтой.” хэмээн ярьсан юм.

Б.Тамир

Эх сурвалж: Шуурхай.мн