Өнгөрсөн амралтын өдөр буюу бямба гаригийн 19.00 цагийн орчимд 0006 УНК улсын дугаартай хар өнгийн G Class маркийн машинтай залуус МУБИС, Улаанбаатар их дэлгүүр, “Хүнсний 20”-ын автобусны буудлын ойролцоо их хэмжээний мөнгө тарааж, 10,000, 20,000 төгрөгийн дэвсгэрт цацсан.

Энэ асуудлын хүрээнд хуульч, өмгөөлөгч Г.Батбаяраас тодруулахад ““Цагдаагийн байгууллагын дээрх асуудлын хүрээнд шалган тогтоох үүрэгтэй. Хэрэв дээрх залуус сонгуулийг будлиантуулах үүднээс эсвэл аль нэг улс төрийн нам, хүчинд давуу байдал бий болгох зорилгоор мөнгө тараасан нь  тогтоогдвол ЭХ-ийн132.1, 82¹-ээр шийтгэгдэхээс өөр арга байхгүй.

Гэвч шалгалтын явцад иргэд өөрсдөө сайн дураараа мөнгө төгрөг тараасан нь тогтоогдвол хариуцлагаас чөлөөлөгдөнө” гэв.

Харин дээрх асуудлын мөрөөр цагдаагийн байгууллагын холбогдох албаны хүнээс тодруулахад “Иргэдээс энэ асуудлаар цагдаагийн байгууллагад гомдол гаргаж ирсэн зүйл байхгүй. Одоогоор мэдээллийн мөрөөр шалгалтын ажиллагааг явуулж байна. Монгол Улсын мөнгөн тэмдэгтийг зүй бусаар захиран зарцуулсан гэх зүйл заалт бий. Энэ дагуу шалгах уу, эсхүл өөр асуудал уу гэдгийг шалгалтын хугацаанд тогтооно” гэлээ.

Дашрамд дурдахад, G Class маркийн автомашинтай залуус 6 сая орчим төгрөг тараасан гэх сураг дуулдаад байгаа юм.


Эх сурвалж: Nehk.mn