2016 оны сонгуульд МАН МАХН эвсэж оролцох эсэх асуудал олны анхаарлыг удтал татаж эцэстээ эвсэхээр шийдсэн ч МАХН-ынхан тохиролцооноосоо буцаж илүүг ихийг шаардаж эхэлсэн учраас эсвэх асуудал цэглэгдсэн. Өөрөөр хэлбэл эвсэж, гэрээ байгуулах эцсийн мөчид МАХН-ын дарга Н.Энхбаяр ажлын хэсгийн гишүүдийн зөвшилцсөн тохиролцооноос “өөр” зүйл хүссэн тул МАН-аас тус намтай эвсэхгүй гэдгээ мэдэгдэж дангаараа сонгуульд оролцохоор шийдээд буй. Тэгвэл МАХН-ын дэд дарга Э.Эрдэнэжамьяан “Эвсэх боломжтой. Сонгуулийн тухай хуульд заасны дагуу МАН-тай эвсэх асуудлыг шийдэхэд  цөөнгүй хоног үлдсэн байна” гэх байр суурийг илэрхийлсэн. Тэгвэл эвсэх боломж үлдсэн эсэхийг МАН-ын нарийн бичгийн дарга Х.Булгантуяагаас тодрууллаа.

-МАХН-ынхан эвсэх асуудлыг ярьж эцэслэх боломж үлдсэн гэх мэдээллийг өгч байна. Хоёр нам эвсэх тухай яриа дахин гарч эхэлсэн гэх ойлголтыг төрүүлээд байна л даа. Үүнд хариулт өгнө үү?

-Сонгуулийн тухай хуулинд зааснаар дөрөвдүгээр сарын 28-нд аливаа нам сонгуульд оролцохоо мэдэгдэж бүртгүүлэх ёстой юм. Бүртгүүлэхдээ есөн зүйл материалыг өгөх ёстойгийн нэг нь тухайн нам эвслийн мөрийн хөтөлбөрт хийсэн дүгнэлт байх юм. Үндэсний аудитын газраас бидэнд “Энэ сарын 20-ны 17.30-ны дотор мөрийн хөтөлбөрөө ирүүлнэ үү. Үүний дагуу мөрийн хөтөлбөртэй танилцаж дүгнэлт гаргаж өгнө. Тус хугацаанаас хойш өгвөл дүгнэлт гаргаж амжихгүй байх эрсдэлтэй” гэсэн зөвлөмж өгсөн. Дүгнэлт гаргах ёстой байгууллагаас ирүүлсэн зөвлөмжийн дагуу бид тус хугацаанаас өмнө мөрийн хөтөлбөрөө өгөхөөр зорьж ажиллаж байсан юм. Аль аль талаасаа. Өрөөр хэлбэл Сонгуулийн тхуай хуулинд заавал 20-ны дотор өг гэж заагаагүй ч тус мөрийн хөтөлбөрийг шалгаж дүгнэлт гаргах байгууллага нь амжихгүй гэж байхад хоцруулж өгөх нь МАН-ын хувьд эрсдэлтэй алхам.

-Эвсэх тухай дахин ярихад нэгэнт оройтсон гэсэн үг үү?

-Энэ долоо хоног өнөөдөр дуусч байна. Ирэх даваа гаригт мөрийн хөтөлбөрөө өгсөн тохиолдолд лхагва гаригтаа буюу хоёр хоногт амжиж дүгнэлт гарахгүй байх магадлал өндөр. Эвсэх тухай сар гаруйн хугацаанд уулзаж зөвшилцсөн. Гэтэл МАХН-ынхан зөвшилцлөөсөө татгалзсан. Одоо үлдсэн цөөн хэдэн хоног үлдсэн шүү дээ. Сонгуулийн тухай хуулинд захирагдах учиртай.

-МАХН-ын дэд дарга  Э.Эрдэнэжамьяан эвсэх боломжтой гэж мэдээлэл өгөөд байгаа нь ямар учиртай юм бэ?

-Сонгуулийн тухай хуулинд энэ сарын 28 гэж заасан байгааг л яриад яваад байгаа юм. Хуулийн тайлбарыг аль нэг нам,  аль нэг намын дэд дарга хийхгүй шүү дээ.

-МАХН-ынхан эвсэх тухай хүсэлтээ МАН-д дахин ирүүлсэн гэж сонссон үнэн үү?

-МАХН-аас эвсэх нэгдэх тухай дурьдсан албан бичгийг ирүүлж байгаа. Хэвлэл мэдээллийн хэрэгслээр ч энэ тухай ярьж байна.

Д.ЖАРГАЛ