АТГ-ын дарга Н.Ганболд албан тушаалаасаа чөлөө­лөгдөх өргөдлөө өгч, түүнийг нь өчигдөр УИХ-ын Хууль зүйн Байнгын хорооны хуралдаанаар хэлэлцэж, УИХ-ын чуулганаар оруулахаар гишүүд санал нэгдсэн.
Нэгэнт АТГ-ын дарга Н.Ганболд өөрийн хүсэлтээр өргөдлөө өгч байгаа учраас түүний хүсэлтийг ёсоор болгох нь ч тодорхой. Харин дараагийнх нь хүн хэн байх вэ гэдэг асуудал олон нийтийн анхаарлыг татаж байна. Тэр байтугай даргыг нь томилохтой зэрэгцэн хуульд нь өөрчлөлт оруулахаар зэхэж буй тухай жиргээ ордны хонгилоор таржээ. Уг нь Авлигын эсрэг хуулийн 21 дүгээр зүйлийн 21.1.Авлигатай тэмцэх газрын дарга, дэд даргыг Монгол Улсын Ерөнхийлөгчийн санал болгосноор Улсын Их Хурал зургаан жилийн хугацаагаар томилно гэсэн байдаг.
Тэгэхээр дараагийн даргыг мөн л Ерөнхийлөгч санал болгох учиртай бөгөөд одоогийн байдлаар хэд хэдэн хүний нэр яригдаж байна. Шүүхийн шийдвэр гүйцэтгэх ерөнхий газрыг тэргүүлж буй Б.Билэгт, Тагнуулын ерөнхий газрыг удирдаж буй Б.Хурц нарын нэр яригдаж байгаа. Тэдгээрээс хамгийн магадлал өндөртэй нь Б.Хурц. Учир нь мань нөхрийг хэзээнээсээ Ерөнхийлөгч Ц.Элбэгдоржийн хүн гэлцдэг. Харин Б.Билэгтийн хувьд нэр нь яригдаж байгаа болов ч мөн л дараагийн сонгуулийн өмнө буюу 2020 онд тэрбээр 60 насны босгонд тулж ажлаа өгөхөөс аргагүй байдалд орно. Өөрөөр хэлбэл хуулийн дагуу зургаан жилийн хугацаатай байдаг АТГ-ын даргын албыг насны хязгаараар дөрвөн жил болгон өөрчлөх шаардлага үүснэ. Энэ утгаараа мань хүний нэрийн ард томоос том анхаарлын тэмдэг дагаж байгаа. Одоо ажлаа өгч буй дарга нь аль эрт энэ шийдвэрийг гаргасан ч дуулиан шуугиан багатай байсан нь дараагийн хүнийг нь сонгоход томилгооны асуудал үүсэх вий гэсэн болгоомжлолтой холбоотой ч гэх юм билээ.
АТГ гэж үндсэн чиг үүргийнхээ дагуу ажиллахаар нийгэмд буюу улс төрийн хүрээнд дандаа хардагдаж сэрдэгдэн, “захиалга” биелүүлдэг гэх нэрийг зүүх болсон. Тэр ч утгаараа АТГ-ын тухай хуульд нь өөрчлөлт хийх гэнэ гэсэн мэдээ Төрийн ордноос аль хэдийн хальжээ.
Улстөрчдийг “тайван байлгах”-аа больсон АТГ-ын дараагийн даргын нэрийг Ерөнхийлөгч санал болгодог байдлыг халах тухай яриа зүгээр ч нэг гараагүй байх. Сураг сонсоход АН-ын дарга З.Энхболд, УИХ-ын гишүүн Н.Алтанхуяг, Х.Баттулга нар уулзаж, энэ тухай ярилцсан аж. Мэдээж үүндээ АТГ-тай бараг л дайн зарлаад байгаа Н.Энхбаярыг хүчийг нэмэх шаардлагатай. Тиймээс мань хүн нь ч БНСУ-аас холбогдож, тохироо хийхэд нь санаа, оноогоо нэмэрлэсэн гэнэ.
Ийн АН болоод МАХН-ынхан АТГ-ыг өөрсдийн дураар буюу УИХ-аас хянаж байхаар хуулийн төсөл санаачилж, түүнийг тун яаралтай өргөн барихаар болсон юм байх. Өөрөөр хэлбэл улстөрчид АТГ-ыг ширээн дээрээ тавьж байгаад амттай бялуу хүртэх гэж буй мэт аяглан, хурууны дохиогоор хөдөлгөдөг болгох л гээд санаархаад байгаа бололтой.
Хэрвээ энэ нь үнэний ортой бол улстөрчдийн хувьд авлига хээл хахуулиа нууцлахын тулд чамгүй “зүтгэж” буйгийн илрэл болох биз.
Юутай ч АТГ-ын даргын хүсэлтийг хүлээн авч хэлэлцэхдээ дараагийн хүний нэрийг тодорхой болгох шаардлагатай, эс тэгвээс эзэнгүйдэж, задгайрна гэж үзэж буй гишүүдийн үг үнэн болохыг илэрийлж байна. Эрх мэдлийг өөрт ашигтайгаар эргүүлэхийн тулд хачин, жигтэй зүйл хийдэг хүн ч олшрох нь бололтойдог шүү.

Эх сурвалж: