Л.Гүндалай гишүүний ой тогтоолт муудсан бололтой. Тэрбээр УИХ-ын чуулганы үеэр эгээ л цэцэрлэгийн хүүхэд шиг хамгийн их хөдөлгөөнтэй, ер зүгээр суудаггүй нэгэн. Саяхан ээлжит чуулганыг орхиод гарсан Л.Гүндалай гишүүн эргэж орж ирээд, бараг л гишүүн бүрийн өмнө, хойно очиж тонголзов.

Учир нь гишүүн урьдын зангаараа ширээ хэсч, үг шидэлж явах зуураа гар утсаа хаана тавьснаа мартчихаж. Хэсэг хугацааны дараа санаад буцаад ирэхэд нь “ангийн нөхөд” нь түүнийг баахан сандаргаж, тийн өөрсдийнхөө өмнө бөхөлзүүлсэн хэрэг. Утсаа хэсэг хайж байснаа дахиад л төрөлхийн зан нь хөдөлж, Н.Алтанхуяг гишүүнтэй яриа үүсгээд суучихсан хойгуур нь Г.Баярсайхан гишүүн нуусан утсыг нь ширээн дээр тавьж буй харагдав. Харин Л.Гүндалай гишүүн буцахдаа ширээн дээр нь байгаа “хаясан” утсаа хараад “Хараа ч муу л даа” хэмээн толгой сэгсрэн гарч одов.