“ЭДМОН” ХХК-ийн захирал Р.Энхбат “Цензургүй яриа” нэвтрүүлэгт өгсөн ярилцлагынхаа үеэр Боловсролын сайд Л.Гантөмөрийг хатуухан шүүмжиллээ. Тэрбээр “…Мүүний асуудал яригдаад эхэлмэгц “Бидний боловсролын төлөө хийж байсан цэвэр ариун ажлыг зүгээр нэг шашны урсгалаар завааруулж байна” гэсэн мессежийг нийгэмд өгөөд эхэлчихлээ. Яг үнэндээ тийм биш. Одоо мүүний шашны асуудал тодорхой. Тиймээс боловсролынхоо асуудал руу оръё. Боловсролын асуудал руу ороход аймшигтай юм гарна. Ард түмний эсрэг юу хийж байгаа нь илэрнэ. Эсрэг гэдгийг илрүүлэхийн тулд бид нар асуудлыг нухацтай ярьж байж л гаргаж ирнэ. Боловсролын асуудал гарт баригддаг бодитой зүйл биш. Тийм учраас тодорхой түвшний хүмүүс хэлэлцэж байж гаргаж ирнэ… Манай эцэг эхчүүд боловсролын бодлогоос дэндүү хол байна. Боловсролоо төрд даатгачихсан. Төр нь дуртай юмаа хийдэг. Бид нарын мөнгөөр компьютер аваад тарааж өгчихөөд ажил хийсэн гэж хэлж болохгүй. Л.Гантөмөрийн ажлын тайлан ердөө л ийм байна. Л.Гантөмөр гэдэг хүн боловсролын тухай ойлголт байхгүй. Энэ хүнтэй боловсролын тухай юу гэж бодож явдаг тухай нь хамт суугаад яримаар байна” гэсэн юм.

Түүний энэхүү ярианы үеэр жишээ авч үзүүлсэн Боловсролын сайдын ажлын тайланд Л.Гантөмөрийн зураг 50 ширхэг орсон байгаа гэнэ. Р.Энхбат өнгөрсөн дөрвөн жилийн хугацаанд сурах бичгийн агуулга, боловсролын бусад асуудлуудтай холбоотой маш олон гомдол саналыг Боловсролын яаманд хүргүүлсэн ч нэг ч хариу өгөөгүй гэдийг өмнө нь хэлж байсан билээ.