Г.Шийлэгдамба үнэнээ өчлөө. Тэр намын даргынхаа шахалт, дарамт дор 120 мянган ам.долларыг “босгож” даргадаа өгөх гэж байгаад баригдсан. Өмнө нь 50 мянган ам.долларыг намын санхүүжилт гэж өгсөн тухай ярив. Хэд хоногийн өмнө түүний гарын үсэгтэй намын дарга болох Н.Энхбаярын үнэн нүүр царайг илчилсэн захидал ил болсон. Захидал ил болдог өдөр Н.Энхбаяр ярилцлагад орж, түүний захидал худал тухай ярьж байлаа. Гэтэл сөргүүлээд Г.Шийлэгдамба өөрийн биеэр Н.Энхбаяр бол авлигач гээд хэлчихлээ. Улс төрд анхаарал татахуйц болж буй үйл явдал бол энэ. Үүнээс хэд хэдэн гаргалгааг хийж болно.

Нэгдүгээрт, Г.Шийлэгдамба бол эр хүн. Тэр хэдийгээр өөрөө шоронд орж, зовлон мэдэрч байж ойлгож байгаа хэдий ч, нам дагавал ямар “ял”-д унадгийг илчиллээ. Сайд дарга болсныхоо төлөө намын даргынхаа шахаан дор санхүүжилт гэгчийг хаанаас, яаж, хэрхэн мөнгө “босгодгийг” нийтэд ил болгов. Энэ нь гаалийн Баатараас хойш дарга нарынхаа булхайг илчилж буй хоёр дахь тохиолдол. Мэдээж энэ бол өөрийгөө аврах нэг гарц гэж харсан учраас ингэж зоригтойгоор дуугарч байгаа биз. Магадгүй цаана нь Н.Энхбаярыг илчилбэл Г.Шийлэгдамбыг гаргана гэсэн улс төрийн тохироо байгааг ч үгүйсгэхгүй.

Хоёрдугаарт, Г.Шийлэгдамба бол урвагч. Намын даргаа хэдэн жил дагаж, МАХН-ын Ерөнхий нарийн бичгийн даргаар 3 жил ажилласан хүн. Н.Энхбаяр гэдэг хүнийг олон жил дагаж, эрх ямбыг нь эдэлчихээд эргээд зовлонг нь үүрч чадахгүй арчаагүй эр хүний дүрээр ч зарим нэгэн хүнд харагдаж байгаа байх. МАХН-ыг авч явахын тулд санхүүжилт хэрэгтэй. Н.Энхбаяр энэ санхүүжилтийг босгохын тулд Засгийн газарт оруулж, сайд дарга нар болгосон. Дарга болгосныхоо төлөө тэднээс мөнгө нэхэх нь түүний хувьд зүйн хэрэг гэж бодож. Даргаа гэж далдганаж байсан хүн нь эргээд ар нуруу руу нь “түгжилдэнэ” чинээ санаагүй биз. Иймээс л Г.Шийлэгдамбыг эр хүн шиг зангүй, урвагч гэж цоллож байна.

Гуравдугаарт, Г.Шийлэгдамбын ганцаардал. Түүнийг шоронд орсны дараа намынхан нь түүнээс холджээ. Намаа ялангуяа Н.Энхбаярыг нүүрийг авч гарахын тулд түүнд тусгайлан бэлтгэсэн албан бланк дээр гарын үсэг зуруулаад явж. Үүнд хамгийн их оролцсон хүн бол Шадар сайд Ц.Оюунбаатар хэмээн тэр ярьсан юм. Хамгийн хачирхалтай Ц.Оюунбаатар хуурамч бичиг гаргаж, дарга нарынхаа талд үйлчлэхдээ гаргууд сайн аж. Нэгэнт намынх нь нүүр буруулсан учир түүнд өөр хэн нэгнийг түшиж, намын даргаа илчлэхээс өөр сонголт үлдсэнгүй. Учир нь эхлээд намынхан нь, дарга нь түүнээс холдсон учир ийнхүү зоригтойгоор дуугарч байгаа бололтой.

Дөрөвдүгээрт, Н.Энхбаярын шунал хийгээд Г.Шийлэгдамбын гавьяа. Хүний шунал дуусдаггүй гэдэг. Гагцхүү шуналаа аль хэмжээнд барьж чадах уу, чадахгүй юу гэдгийн хооронд хүний мөн чанар орших учиртай. Н.Энхбаяр хязгааргүй шуналтай. Энэ шуналаа ч барьж дийлэхээ байж. МАХН олон сайд дарга нартай. Н.Энхбаяр бүгдээс нь санхүүжилт босгохыг шаардаж байгаа. Г.Шийлэгдамбын хувьд амиа бодоод, намын даргынхаа увайгүй шуналтайг илчлээд яваад өглөө. Харин бусад сайд нарын хувьд тийм эрх байхгүй. Мэдээж дарга болсон учир хариуг нь барих ёстой гээд Ц.Оюунбаатар, З.Баянсэлэнгэ, Ц.Цолмон нар мөнгө босгоод л яваа байх. Ганцхан Г.Шийлэгдамбаас үүнийг шаардаагүй нь лавтай.

Харин Г.Шийлэгдамбын хувьд өөрөөрөө дамжуулан том гавьяа байгууллаа. Нам дагах нь тийм сайхан зүйлд хүргэхгүй, бохир улс төр гэдгийг харуулав. Мөн намын санхүүжилт гээч нь зөвхөн МАХН-д байгаа юм биш. МАН, АН-д ч бий гэдгийг нийтэд таниуллаа. Энэ нь маш том асуудлыг хөндөж байна. Юу гэвэл Монголд Улс төрийн намын тухай хууль хэрэгтэй. Хууль эрх зүйн орчныг гаргаж, намын санхүүжилтийн асуудлыг ил тод болгохгүй бол сайд дарга болсныхоо төлөөсөнд авлига авч, гэмт хэрэгт холбогдох ёстой болж байна. Энэ бүгдийг хожим ч гэсэн өөрөөрөө дамжуулан харуулж байгаа нь түүний нэг гавьяа.

Ц.Энх

Эх сурвалж: Цензургүй.мн