Энэ эмгэгийг оношлоход түвэггүй. Нүдэнд ил харагдахаас гадна урваж гарсан мах хошногоны амсар хунигдах үед хавчигдан өвдөлт өгөх төдийгүй өтгөн дутуу гарсан мэт санагдан улам дүлж үүнээс шалтгаалан цус гарах нь ч бий. Өтгөнөөр бие засахад маш зовиуртай болох тул өтгөнөө хүчээр барьж хатаан байдлыг улам ч хүндрүүлдэг юм. Тиймээс урваж гарсан хэсгийг даруй буцааж оруулахгүй бол зовиур намдахгүй. Үндсэн шалтгаан нь хүнд биш бол нэг гарсан хэсгийг буцааж оруулснаар илаарших нь байдаг ч тун цөөн талдаа. Ялангуяа том хүний хувьд нэгэнт уравсан шулуун гэдэсний хэсэг дахин дахин гараад байх зуршил тогтох хандлагатай. Ийм тохиолдолд мэс заслын аргаар урваж гарсан шулуун гэдсийг дээш татаж сойн бэхлэх, цагираг булчин чангалж танах ийм мэс ажилбар үр дүн муутай тал бий хошногоны амсарыг нарийсгах энэ хэлбэр ч тийм сайн аргад тооцогддоггүй гэхчлэн хүндэвтэр хагалгаа хийх шаардлагатай болдог.

Харин нярай болон бага насны хүүхдийн хувьд үндсэн өвчнийг нь сайн эмчилж, биеийн эсэргүүцэл сайжруулах төрлийн эмчилгээ тууштай хэрэглэн, амин дэм, тэжээллэг хоол хүнс, чийрэгжүүлэх дасгал хөдөлгөөний үр дүнд дахин хөдлөхгүйгээр илааршдаг. Ер нь цагаан мах гарсан үед эмнэлэгт үзүүлж эмчилгээ сонгох нь чухал. Эмнэлэгт хурдан очих боломжгүй үед урваж гаран хавчигдсан цагаан махыг буцааж оруулах хэрэгтэй болдог. Нярай болон бага насны хүүхдийн хоёр хөлийн шилбэнээс хоёр гараараа атган толгойг доош харуулсан байдлаар дээш өргөөд хөлийг хоёр тийш алцайлгана. Бага зэргийн урвалт энэ үед буцаж орох нь бий. Ингээд орохгүй бол гарынхаа алгыг зориулалтын, эсвэл шар тос, Вишневскийн тос өмхий ногоон гэдэг дээ , загасны тос зэргийн аль нэгээр сайн тослоод урваж гарсан шулуун гэдсийг зөөлөн илэх, эргүүлэх маягийн хөдөлгөөн хийхийн зэрэгцээ бага багаар цааш түлхэн оруулдаг. Ингэж оруулсны дараа хоёр өгзөгийг сайн хавчсан байдлаар боох хэрэгтэй.

Харин том хүний хувьд арай өөр арга хэрэглэдэг. Хүнээ бие засах гэж байгаа мэтээр хөлийг нь нугалж суулгана. Тэгээд гарынхаа зориулалтын резинэн бээлий өмсвөл сайн   алган дээр дээр дурдсан тоснуудаас аль нэгийг ахиухан асгаад урваж гарсан шулуун гэдэсний доороос дээш түлхэх, хагас эргүүлэх байдлаар оруулах оролдлого хийдэг. Шулуун гэдэс урвах нь ихэнхдээ шамбарамтай хавсарч байх тул эмнэлэгт заавал хандах нь зөв. Тэгээд ч ингэж оруулах нь зөвхөн тухайн үед өвчтөний зовиурыг түр арилгах арга мөн. Гэхдээ өтгөн хатаж их дүлсэн болон түүнтэй ойролцоо шалтгаанаар шулуун гэдэсний салст хэсэг урваж гарсан бол нэг удаагийн үйлдэл бүрэн засалт болох нь бий.

Эмч.мн