Архангай аймгийн Хөдөлмөрийн хэлтсийн дарга Б.Баатарсүрэн нь албан тушаалаа ашиглаж гэр бүлийнтэйгээ төслийн гэрээ байгуулан мөнгөн урамшуулал олгосныг АТГ-ынхан иргэдийн мэдээллийн дагуу шалгаж тогтоожээ.

Тэрбээр эхнэрийнхээ үүсгэн байгуулж, 100 хувь эзэмшиж, үйл ажиллагаа явуулж байгаа хуулийн этгээдтэй Хөдөлмөр эрхлэлтийг дэмжих тухай хуульд зааснаар ажил олгогчийг дэмжих гэрээг байгуулж 2013 онд 3.369.600 төгрөгийн урамшууллыг олгосон байна. Түүгээр зогсохгүй төрсөн эцэг Б болон төрсөн дүү Б нартайгаа Хувиараа хөдөлмөр эрхлэгч болон нөхөрлөл, хоршоо байгуулах иргэнийг дэмжих төсөл хэрэгжүүлэх тухай гэрээг байгуулж, тус бүр гурван сая төгрөгийн санхүүгийн дэмжлэг олгосон нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан хориглолт, хязгаарлалтыг зөрчжээ.

Мөн Б.Баатарсүрэн нь 2013-2014 оны хувийн ашиг сонирхлын мэдүүлэг болон хөрөнгө, орлогоо мэдүүлсэн нь Авлигын эсрэг хуулийн 10 дугаар зүйлийн 10.2-т заасныг зөрчсөн байх тул түүнд хариуцлага тооцуулахаар Хөдөлмөрийн сайд Г.Баярсайханд Авлигатай тэмцэх газраас албан бичиг хүргүүлсэн байна.

Эх сурвалж www.wikimon.mn