Хатуухан үгтэй энэ эрийн элдэв сонирхолтой тодорхойлол, хөгжөөнт хошигнол нь өнөөгийн нийгмийн үнэн дүр төрхийг өнгө чимэггүй харуулчихдаг болохоор цахим ертөнцөд түүнийг дэмжих хүн тун олон. “Никитон” хамтлагаасаа бүрмөсөн гарч, өөрийн гэсэн амьд хөгжмийн хамтлаг байгуулах болсноо дуулгаад байгаа гитарчин Өөжгий уран бүтээлийнхээ зэрэгцээ улс орны амьдралд ихээхэн анхаарал тавьж явдаг юм билээ.

Тиймдээ ч өөрийн цахим хуудсаараа дамжуулан үзэл бодлоо жинтэйхэн илэрхийлж, өнөө цагийн улстөрчдийг нүүр хийх газаргүй болтол нь “шардаг” ажилтай суугаа биз. Энэ ч утгаараа, мань эр өвөл цагийн Утаанбаатар буюу нийслэлийн хотынхоо төв талбайг хэрхэн гэрэл зурагт буулгаснаа олон нийтэд сонирхууллаа.

Эрүүл мэндэд асар их хор нөлөөтэй агаарын бохирдлоос хамгаалах гэж баг зүүж, нуувчинд орох шахам өвөлждөг нийслэлийн иргэд ч хаана хэнд хандахаа мэдэхгүй явдаг нь нууц биш. Харин гитарчин Өөжгий энэхүү зургаа “Утаанбаатарын дүр зураг.
Төр нь ч МАНАНтаад, хот нь ч манантаад. Манийгаа ингэж жаргааж байгаа засаг төрдөө баярлалаа” хэмээн шулуухан тайлбарласан нь олон хүний дэмжлэг авчээ.