МУГЖ, дуучин С.Батсүхийн “Орчлонг хайрлаарай”, “Ухаарал” зэрэг дууг эвлэгхэн дуулж олны хайр хүндэтгэлийг хүлээгээд байгаа бяцхан дуучин Б.Бат-Энэрэл хүүд зориулсан “ЭЭЖИЙГЭЭ ЭХ ДЭЛХИЙГЭЭ ТОД ХАРАХ МЭЛМИЙ ХАЙРЛААРАЙ” нэртэй хандивын тоглолт МҮЭСТОрдонд 2017 оны тавдугаар сарын 20 -ны 19 цагт болно. Төрөлхийн харааны бэрхшээлтэй төрсөн ч нэг настайгаасаа сул хардаг болсон Б.Бат-Энэрэл хүү саяхан эгчийн хамт гадагшаа явж нарийн шинжилгээнд оржээ. Мэргэжлийн эмч нар хүүг зургаан нас хүрэхээс урьтаж мэс заслын аргаар харааг нь сайжруулах боломжтойг зөвлөснөөр Энэтхэг улсад нүдний хагалгаанд орохоор болсон гэнэ.

Хандивын аянд зориулан МУГЖ С.Батсүх “Хаан заяатай орчлон” дуугаа Б.Бат-Энэрэл хүүтэй шинэчлэн дуулж, клипжүүлсэн байна. Энэхүү дууг “Мобиком”-ын хэрэглэгчид “Hitone”-доо татаж тоглуулснаар хүүгийн эмчилгээний зардалд хувь нэмэр оруулах юм байна.  Мөн олон нийт бяцхан дуучинд мэлмий хайрлахыг хүсвэл “Хаан” банкны  Сэдрагчаа Рэнчинпагма 5005705589 дансанд сэтгэлийн өргөл өгөх боломжтой юм.