Монгол Улсын Ерөнхийлөгч Ц.Элбэгдорж Итали улсад айлчилж байгаа билээ. Тэрбээр мөрөөдлөө биелүүлж, алдарт “Интер Милан” клубийн төв байранд өчигдөр зочилжээ.

Энэ талаар Италийн хэвлэлүүдэд онцлон мэдээлсэн байна. Манай Ерөнхийлөгчийг угтаж авсан “Интер Милан” багийн ерөнхийлөгч Массима Моратти “Монгол Улсын Ерөнхийлөгч Цахиагийн Элбэгдорж манай клубт зочилж байгаа нь бидний хувьд их хүндэтгэл” хэмээжээ. Тэрбээр хэвлэлүүдэд өгсөн ярилцлагадаа “Ц.Элбэгдорж бол гайхалтай хүн. Зөвхөн улс төрийн бодлогын хувьд бус тэрбээр соёл урлагийн, хүмүүнлэгийн, дэлхийн дулаарлын талаар гээд бүхий л салбарт анхаарал хандуулдаг. “Интер Милан”-ы үнэнч шүтэн бишрэгч байж, тоглолтыг маань алгасалгүй үздэг юм билээ. Итали, Монгол орны хувьд цагийн зөрүү ихтэй байдаг хэдий ч тэрбээр бидний тухай бүгдийг мэдэж байсан. Монголын Ерөнхийлөгч манай тоглогч Коутиньо, Форлан нартай уулзсандаа тун их баярласан. Ерөнхийлөгч Ц.Элбэгдорж өнгөрсөн жил FIFA-д зочилж, хөлбөмбөгийн спортыг өөрийн оронд хөгжүүлэх талаарх саналаа хэлж байсан юм” гэжээ.

Харин Ерөнхийлөгч маань Монголын айлчлалын бүрэлдэхүүнийг хүндэтгэн, хүлээж авсанд нь талархал илэрхийлээд Италийн хөлбөмбөгийн дасгалжуулагч, тоглогчдыг Монголд урьж ажиллуулах, хөлбөмбөгийн сургууль байгуулах “Интер кампус” төслийг эх орондоо хэрэгжүүлэх зэрэг хэд хэдэн хүсэлт тавьжээ.

Үүний хариуд ноён Моратти дэлхийн 24 оронд хэрэгжүүлж буй “Интер кампус” төслийг Монголд хэрэгжүүлэхээ амласан байна. Дашрамд дуулгахад, “Internazionale Milano” клуб 1908 онд байгуулагдсан. Багийн дасгалжуулагч Клаудио Раньери, ахлагч Хавьер Занетти. Аваргуудын лиг, UEFAгийн цомд тус бүр гурав, клубүүдийн дэлхийн аваргад нэг түрүүлсэн юм.

Э.ХАНА