Хил, тагнуул, цагдаагийн сургуулиудыг нэгтгэсэн нь тус сургуулийн оюутнуудын болон олон хүний эгдүүцлийг төрүүлсэн. Одоо Цагдаагийн академи хөх, саарал, ногоон гурван янзын хувцастай сонсогчдынхоо учрыг олохгүй хөл толгойгүй юм болж байна. Тагнуулынхан нь нөгөө хоёроосоо нууц байх ёстой гээд байдаг, хилийнхэн ч бас тусдаа үүрэг роль, статустай, цагдаагийнхан ч бас тэр. Айлуудын хонь хурга нийлсэн юм шиг хачин юм болж байна гэнэ. Нууцаар бэлтгэгдэж, нууц байх ёстой тагнуулынхныг хил, цагдаагийн сургуулийнхан нь “дооёолоод” бүр ч инээдтэй юм болж байгаа юм байх. “Та нарын тагнуул гэж юу байсан юм бэ. Энд ингээд хэн хүний нүдэн дээр ил, тэгээд сайн муугаа олонд мэдүүлээд яг тагнуулдаж харагдаач” гэх маягийн үгийг энэ сургууль дотор сонсч болно. Уг нь ХЗДХ-ийн сайдын энэ шийдвэрийг Монгол Улсын Ерөнхийлөгч нь хүртэлж буруушааж, Засгийн газрын хуралдаанаар дахин хэлэлцэх үүрэг даалгавар өгсөн юм билээ. Харин өнгөрөгч баасан гарагт хуралдсан Засгийн газрын хуралдаанаар дээрх хүчний гурван сургуулийг нэгтгэхтэй холбогдсон асуудлыг дахин авч хэлэлцэж, нэгтгэсэн нь зөв гэж үзээд түүгээр ч зогсохгүй сургуулиудыг нэгтгэхтэй холбоотой асуудлыг улам тодотгон эргэлтийн болоод үндсэн хөрөнгийг орон тоо төсвийн хамт Дотоод хэргийн их сургуульд шилжүүлэхээр болсон байна. Энэ нь Ерөнхийлөгчийн албан бичигт өгсөн Засгийн газрын албан ёсны “татгалзсан” хариу боллоо. Уг нь Ерөнхийлөгч “Монгол Улсын Батлан хамгаалах тухай хуулийн 8 дугаар зүйлийн 1 дэх хэсгийн 3-т заасны дагуу Засгийн газар цэргийн анги, байгууллагыг байгуулах, татан буулгах тухай асуудлыг Зэвсэгт хүчний ерөнхий командлагчтай зөвшилцөн шийдвэрлэх журамтай. Гэтэл Засгийн газрын 2011 оны 229 дүгээр тогтоолоор цэргийн ангийн статустай цэргийн байгууллага байгуулсан шийдвэрийг хүчингүй болгох асуудлыг зөвшилцөлгүйгээр шийдвэрлэсэн нь хууль зөрчсөн тул дээрх тогтоолыг хүчингүй болгох нь зүйтэй” гэж албан бичиг илгээсэн байсан. Ийнхүү Засгийн газар Ерөнхийлөгчийнхөө өөдөөс дунд хуруугаа гозойлгочихлоо.

Б.Сансар

Эх Сурвалж: “МОНГОЛЫН МЭДЭЭ” СОНИН