С.САРУУЛ

100 жилийн түүхтэй Монголын үйлдвэрчний эвлэлийн байгууллага өнөөдрийг хүртэл хамгийн олон гишүүн дэмжигчтэйгээ тунхагласаар ирсэн. Зөвхөн идэвхитэй гишүүдийн тоо 200-300 мянга хол давдаг энэ байгууллага татвар төлөгчдийн мөнгөөр санхүүждэг. Дүрэмд  “Үйлдвэрчний эвлэлийн хороод нь гишүүдийнхээ татварыг сарын цалин хөлс, түүнтэй адилтгах орлогын нэг ба түүнээс дээш хувьтай тэнцэх хэмжээгээр тогтоож, бэлэн бусаар хураана” гээ заажээ. Өөрөөр хэлбэл, багаар бодоход жилд 100 гаруй сая төгрөг эдний данс руу ордог гэсэн үг юм. Гишүүдээс татварын энэ их мөнгө авч байгаагийнхаа төлөө хөдөлмөрчдийн эрх ашгийг хамгаалах үүрэгтэй. Гэтэл цалин нэмнэ гэж тэмцэж жагсч явдаг байсан Үйлдвэрчний эвлэлийн байгууллага гишүүдийнхээ эрх ашгийг хамгаалж байна уу гэдэг эргэлзээтэй болов. Тухайлбал, цалин нэмүүлэхээр тэмцэж буй багш нарыг дэмжихгүй байгаагаа илэрхийлж байсан нь саяхан. Банкны зээлэнд барьцаалагдсан багш нарын бодит нөхцөл байдлыг мэдсэн хэрнээ үүргээ биелүүлж үгээ хэлэхгүй хумсаа нууж байгаа үйлдвэрчний эвлэл гэх толгой байгууллагыг улстөртэй холбох нь ч бий.

Тэгвэл маргааш /2017.11.08/  эхлэх  Үйлдвэрчний эвлэлийн их хурлыг угтсан шинэ ерөнхийлөгчийн сунгаа өнгөрсөн өдрүүдэд эрчимтэй явагдав. Үнэндээ олон мянган гишүүдийнхээ эрх ашгийг хамгаалахаас эхлээд Засгийн газраас эхлээд бүхий л шатанд шантаажилж байдаг Үйлдвэрчний эвлэлийн байгууллагад арай өөр арга барил хэрэгтэй байгааг өнгөрсөн хугацаанд өрнөсөн олон үйл явдлаас харж болно. Ядаж гишүүдийнхээ эрх ашгийг тууштай хамгаалахад байгууллагаа зөв чигт толгойлоод явах Ерөнхийлөгч хэрэгтэй байгаа юм.

Тус байгууллагын Ерөнхийлөгчийн сунгаанд одоогийн ерөнхийлөгч Х.Амгаланбаатар, Эрүүл мэндийн үйлдвэрчний эвлэлийн холбооны ерөнхийлөгч Б.Мягмар, МҮЭХ-ын нягтлан бодогч нар нэрээ дэвшүүлээд байгаа юм. Х.Амгаланбаатарын хувьд 1997 оноос хойш үйлдвэрчний эвлэлийн байгууллагатай холбогдож иржээ.

Х.Амгаланбаатар:

-1997 МҮЭХ-ны ерөнхий зөвлөл Хөдөлмөр хамгаалал хяналтын асуудал хариуцсан мэргэжилтэн

-2000 онд Нийслэлийн ҮЭ-үүдийн холбооны дарга

-Бизнесийн удирдлагын менежерээр магистрын зэрэг хамгаалсан

-2007 онд МҮЭ-ийн холбооны Хөдөлмөрийн хүний төлөө медалиар шагнав

-2008 онд МҮЭ-ийн холбооны ерөнхийлөгч

-2008 Хөдөлмөр, нийгмийн хамгааллын тэргүүний ажилтан

Б.Мягмар:

Б.Мягмар эрүүл мэндийн үйлдвэрчний эвлэлийн даргаар арваад жил ажиллаж эмч нарын эрх ашгийн төлөө тэмцэж ирсэн юм.

-Сувилахуйн арга зүйч (2006 онд ахлах зэрэг хамгаалсан), Хөдөлмөрийн эдийн засагч,эдийн засгийн ухааны магистр, докторант.

-Клиникийн Нэгдүгээр Амаржих Газарт Сувилахуйн арга зүйч, -Хүний нөөцийн менежерээр 2001-2009 он хүртэл ажиллаж, 2009 оноос Монголын эрүүл мэндийн ажилтны ҮЭ-ийн холбооны даргаар  хоёр дахь удаагаа сонгогдон ажиллаж байна.

Б.Гэрэлмаа:

-Б.Гэрэлмаа үйлдвэрчний эвлэлийн байгууллагад нягтлангаар 20 гаруй жил ажилласан ч саяхнаас байгууллагынхаа булхай луйврыг илчилж олны өмнө гарч ирсэн юм. Тэрээр “Манай холбоо асар их хөрөнгөтэй газар байлаа. Зах зээлийн эхэн үед л гэхэд тэтгэвэр тэтгэмж тавьдаг, төв талбайг тойрсон хоёр ч оффистой, спорт заалтай, уулын ам болгонд шахуу нийт 130 гаруй зуслантай, аймаг болгонд контортой, ахмадын сувилалтай, хүнсний ногооны өргөн уудам талбайтай, 20 гаруй тэрбум төгрөгийн хөрөнгөтэй, 650 сая төгрөгийн бэлэн мөнгөтэй, 300 гаруй авто машинтай, адуу, үхэр, хонин сүргийн сууриудтай байсан. Гэвч үе үеийн дарга нар дээр дурдсан хөрөнгүүдийг хувьдаа завшаад дуусч байна. Одоо МҮЭХ-нд Сүхбаатарын талбайн баруун хойд талд байх төв оффисын барилга зэрэг цөөхөн зүйл үлдээд байгаа” гэж мэдэгдэж байв.

Эх сурвалж: Зууны мэдээ сонин