Ерөнхийлөгч, УИХ-ын дарга, Ерөнхий сайд болон намын дарга нарт шаардах бичиг хүргүүлсэн С.Жавхлан гишүүн шаардлагынхаа хариуг авч чадалгүй нэг сарын нүүрийг үзэж байгаа юм. Хууль тогтоох дээд байгууллагад болж бүтэхгүй нөхдүүд байгаа тухай хэлж ярьж ирсэн түүнийг хаврын чуулганаас хойш шалтгаангүйгээр хурал тасалсан гэх мэдээллийг УИХ-ын тамгын газраас өгөөд буй. Тэгвэл тэрбээр хэвлэлд ярихдаа  “Овт шааруудын эсрэг жагсаал дээр очоод мэдэгдэл хийсэн. Шаардлагаа тэр даруй оруулж ирээд өгсөн. Гэтэл тэр зүйлийг баллуурдаж хаяад, Жавхлан ажлаа тасалж байна гэж хэвлэл мэдээллээрээ маш их балбалаа. Эд нар сэтгэлд нь нийцэхгүй юм болохоор хурлаа хаяад гардаг, Жавхлан шаардаад тэмцэхээр ажил тасалсан болчихдог нь сонин байгаа биз. Жавхлан уг нь хурал хаяад, ажил хаялт зарлачихаад байгаа байхгүй юу даа. Таслаад байгаа биш байхгүй юу. Үүнийг тасдаад байна гэж ойлгуулаад байна. Энэ бол тэмцэл юм аа. Би уг нь энэ танхим дотор суухгүй надаар их дутах байх, дутахаар энэ хүмүүс болсон болоогүй хариу өгчих байх гэж бодсон, надаас айна гэж байдаггүй юм байна.  Би байхгүй байвал эд нарт аз жаргал юм байна. Миний дуу хоолой энд хүрэхгүй байна. Уул хаданд очиж хашгирсан. Сонсдог хан тэнгэр гэж байдаг бол тэнд очиж үнэнээ өчсөн. Энд үнэн үг хүлээж авахгүй байна. Мөнх хөх тэнгэр, эцэг өвгөдийнхөө шүтээнд очиж гомдлоо хэлсэн. Оффшорчдын нэрийг зарлаад орилсон юм. Тэнд өөртөө тохиолдсон бүхнээ дотроо онгойтол хашгирсан. Энд олуулаа нийлээд намайг боорлоод тал, талаас хэмлээд байна гээд ховлосон, хөх мөнх тэнгэр сонссон болоод би хүчтэй болж байгаа гэж үзэж байна.” хэмээн ярьжээ. Мөн Ерөнхийлөгчийн сонгуультай холбоотойгоор хэлэхдээ “Учиртай гурван толгой” нэртэй, тавилттай эмгэнэлт, зохион байгуулалттай, үгсэн хуйвалдсан жүжиг тавигдаж байна гэж би дээр хэллээ. Нялуунаас шулуухан нь дээр, энэ сонгуулийг болгохгүй гэсэн бодолтой байгаа. Энэ хүмүүст сонголт байхгүй. Хүмүүс дэлгүүрт ороод наад зах нь 30-40 төрлийн 00-ын цааснаас сонголт хийж байгаа шүү. Гэтэл гуравхан ёдор толгой гаргаж ирчихээд сонго гээд байх юм. Орчин цагт түмэн янзын гар утас, машин тэрэг сонгож хэрэглэж байна. Яагаад Монгол Улсын Ерөнхийлөгч гэдэг лангуун дээр гуравхан толгой гаргаж ирээд байгаа юм бэ. Яагаад булгилсан халуун сэтгэлтэй залуус, мэргэн ухаантай малчин хүн, эгэл жирийн хэнбугай ч дэвшиж болдоггүй юм.” хэмээн ярьсан байна.

Эх сурвалж: Шуурхай.мн