Хамгийн их үзэгчтэй, нэр хүндтэй шоу болох “Яг түүн шиг- 2” нэвтрүүлгийн зургаа дахь дугаар үзэгчдийн хүртээл болж уламжлал ёсоороо хоржоонтой яриа, хошин үгс дагуулсаар амжилттай өндөрлөв. Шоуны туршид гурав дахь ялалтаа байгуулаад буй “Х ТҮЦ” хамтлагийн найдвар болсон авьяаслаг жүжигчин Т.Бархүү энэ удаад “Никитон” хамтлагийн дуучин Т.Батчулууны “Чи минийх” уран бүтээлээр ялалт байгуулж олныг цэнгүүлсэн юм. Гадны болоод Монголынхоо оддыг тайзан дээр чадварлагаар амилуулж буй түүний авьяасыг олон түмэн шагшин магтаж шоуны нэрийг “Бархүүг Бархуу” хэмээн өөрчилвөл зохилтой гэж хошигноцгоож байв. Өмнөх дугаарт үзэгсгэлэнт хань И.Одончимэг нь нулимс дуслуулж сэтгэл догдлон үзэж байсан бол энэ удаад том охин З.Номундарь нь шоуны заалыг бахархлын нулимсаараа чимж найз нөхөд нь уухайн түрлэгээр урмыг нь хурцалж байв. Ийнхүү халуухан дугаарт гурав дахь ялалтаа байгуулсан Т.Бархүүг бараг л байрны урьдчилгаа хийхнээ гэж сошиалын баатрууд хошигнож сууна. Оддыг сонгох товч түүнд ихээхэн ээлтэй хандаж байсан бол энэ удаад элдэв гажаараа алдартай Америкийн дуучин Грэмми шагналт Майли Сайрусыг дуурайх хэцүүхэн даалгавар түүнд оногдсон билээ. Бүсгүй хүн тэр дундаа үргэлжийн хагас нүцгэн байдал зонхилж байдаг халимаг үстэй этгээд бүсгүйг хэрхэн дуурайхыг шоуны шинэ дугаараас харах л үлдлээ дээ.

Эх сурвалж:Шуурхай.мн