“Боловсрол” суваг телевиз “Эндемол Шайн” группийн албан ёсны эрхтэйгээр “Яг түүн шиг-2” шоуг үзэгчдэд хүргэж байгаа билээ. Тулаан ч ширүүхэн эхэлж долоо хоног бүр дэлхийн болоод Монголын одод нэгэн зэрэг тайзнаа чуулж үзэгч түмнийг баясгасан тус шоуны уран бүтээлчид хоёр дугаарын ард гараад байгаа билээ. Жүжигчин Т.Бархүү анхны ялалтаа авч шуугиан тариад байсан бол ээлжит сенсацийн эзнээр дуучин Б.Халиун тодорсон билээ. Сүүлийн үед уран бүтээлийн хувьд чимээ аниргүй хэсэг хугацааг өнгөрөөсөн бүсгүй энэ удаад зориг шулуудан чадварлаг уран бүтээлчидтэй өрсөлдөж байгаа. Тэрээр хайрын дууч С.Сэрчмааг дуурайж өөрийнхөө элэглэх авъяасыг чамлахааргүй гэдгийг олонд ядах юмгүй харуулаад амжив. Дуучин Sally өөрийн цахим хуудаснаа “Яг түүн шиг”-т би түрүүлчихлээ. Халиунаатайгаа мөнгөө хувааж авнаа хэмээн хошигнож бичсэн нь мэдээллийн сайтуудын олз болов гэлтэй янз бүрийн гарчигтай мэдээллүүд харагдах болсон. “Сэрчмаа гурван сая төгрөг өг гэж Халиуныг дарамталжээ” гэх зэргээр бичсэнд дуучин бүсгүй ихэд эмзэглэж олонд залруулга хийсэн юм. Үргэлжийн онигоо, инээдтэй, хөгжилтэй зүйлсээр пэйсбүүк хуудсаа дүүргэж байдаг түүнийг шар хэвлэлийнхэн сүүлийн үед дуучин биш онигоочин болов гэж шүүмжилж байсан билээ.

Эх сурвалж:Шуурхай.мн