ОУВС-аас тавьсан шаардлагын хүрээнд 7-8 төрлийн татвар нэмэх ёстой болоод буй. Тэдгээрээс хамгийн түрүүнд мөрдөгдөж эхлэх нь Хадгаламжийн хүүд татвар ноогдуулах тухай юм. Үүнд шүүмжлэлтэй хандах талууд байгаа. Тэгвэл хөрөнгийн зах зээл судлаач Д.Ангар news.mn сайтад   өгсөн ярилцлагадаа энэ талаар хэлэхдээ “Өнөөдрийн байдлаар манай улсын арилжааны банкуудын нийт хадгаламжийн 98 хувийг хадгаламж эзэмшигчдийн хоёрхон хувь эзэмшдэг. Том утгаар нь яривал нийт хүн амын хоёр хувь гэж ойлгож болно. Тэдэнд зориулсан шийдвэр гэж ойлгож ч болно. Босго тогтоохын тухайд байж болохгүй зүйл гэж би хувьдаа үзэж байгаа. Хадгаламж эзэмшдэг хүн бүр хүүнд авч буй ашгаасаа 10 хувийг өгдөг байх нь шударга хэрэг болно.

Ямарваа нэг босго тогтоохоор цоорхой үүсэх  талтай.  Мөнгөтэй хүмүүс чинь ухаантай шүү дээ. Их хэмжээний хадгаламжийн хүүнээс татвар аваад эхэлмэгц  татвараас зугтахын тулд хадгаламжаа тогтоосон босгод багтаан  хувааж хийхэд хүрнэ шүү дээ. Монголчууд хууль даган биелүүлэхдээ тун хойрго хэрнээ түүнээс зугтах бултах аргыг амархан бодож олдог. Тиймээс ОУВС-гийн шахалтан дор банкны салбарын татварыг багтаасан нь тун зөв шийдэл гэж ойлгож байгаа. Хадгаламжийн хүүд татвар ногдуулах чимээнээр хүмүүс хөрөнгийн зах зээл рүү хошуурч эхэлж байна. Ганцхан өнөөдөр /2017.03.14/-ийн жишээ татъя л даа. Засгийн газар 13 тэрбум төгрөгийн бонд арилжаалах байсан ч иргэд, аж ахуйн нэгжээс 55 тэрбумын захиалга  ирээд байна. Саяхныг болтол Засгийн газрын арилжаалж буй бондын багагүй хувийг арилжааны банкууд авдаг байсан бол одоо арилжааг иргэд дангаар бүрэлдүүлэхэд хэмжээнд хүрээд байна. Аж ахуйн нэгжүүд 50-100 сая төгрөг, 10-20 сая төгрөгөөр бонд авч буй бол иргэд нэг сая, 500 мянгаар Засгийн газрын бонд авч байгаа. Иргэд хамгийн багадаа 100 мянган төгрөгөөр бонд авах боломжтой. Хугацааны хувьд ч 3-6 сар болон  нэг жил, гурван жилийн хугацаатайгаар бонд авч болох юм. Хөрөнгийн зах зээл ингэж л хөгждөг. Манай улсын хувьд хөрөнгийн зах зээлээ хувьцаагаар эхэлсэн нь маш буруу зүйл байсан. Хувьцааг хүмүүс тэр бүр ойлгохгүй. Иргэд бүү хэл, төр засаг нь ч ойлгоогүй.  Голланд, Англи улсууд 1600 жилийн тэртээ Засгийн газрын бонд гаргаж, хөрөнгийн зах зээлийн суурийг тавьж байсан. Хувьцаа бол бондын дараах алхам байх учиртай.” хярьсан байна.