Кино хэмээх их урлагт хүч түрэн гарч ирсэн нэг үеийн шижигнэсэн залуус хэсэгтээ л уран бүтээлээрээ “бөмбөгдсөн” гэхэд буруудахгүй. “Аз жаргалын шок”, “Маш нууц”, “Том толгойтын романс”, “Миний ах атаман” зэрэг олны таашалд бүрэн нийцсэн уран бүтээлийн эзэд бол фантастик продакшны залуус юм. Бодит явдлаас сэдэвлэн бүтээсэн “Маш нууц” уран сайхны кино нь үзэгчдийн сэтгэл зүрхэнд тодоос тод үлдсэн учир дараа дараагийн уран бүтээлүүдийг нь тэсэн ядан хүлээдэг болсон сурагтай. Эдгээр залуусын нэг болох жүжигчин Ж. Алтаншагайг үзэгч олон шаггүй хөдөлмөрч чадварлаг уран бүтээлч төдийгүй хамгийн их эрэлттэй хөтлөгч гэдгээр нь андахгүй бизээ. Ихэвчлэн эсрэг дүрээр үзэгчдэд танигдсан түүний ширүүн хурц төрх эгэл жирийн нэгэн аавын дүрийг ч бүтээж чаддаг юм шүү гэдгээ “Том толгойтын романс” хэмээх бүтээлээрээ харуулаад амжсан. Мөн түүнчлэн “XXI зууны залуу цэвэрхэн байх хэрэгтэй” гэдэг дүрмийг өөрийн зорилгоо болгож амьдардаг тэрбээр хаа ч очсон гялтганасан ботинк, хурц индүүдлэгтэй костюм зэргээрээ өөрийн хэлсэн үгээ батлан харуулдаг юм.

Эх сурвалж: Шуурхай.мн